Thursday, January 1, 2009

Mulaika Pengingat: Nebang Mulong

Asal kami ari Batang Skrang, tang pindah keterubah ia ke Nyelong Sarikei lalu ari Nyelong ke Dijih Mukah. Sida aki ini berumah panjai ba ulu Dijih lalu berimba kampong puang, bumai betaun. Nyamai endur ngidup ke diri laban maya nya kelia maioh babi enggau jelu kampong bukai. Pengudah nya sekeda ari kami serumah pindah ke Ng Luau, ia nya ili Dijih, laban deka bumai paya lalu menua nya mayuh ikan.

Di Ng Luau sida aki ini bumai lalu maya ke lepa pengawa nanam mulong ngambi bisi diperingga. Sida aki ini bulih amat padi sampai bisi dijual ngagai pasar di Ng Kenyana. Rega padi sampai chukup kena meli injin sepit. Maya nya kelia nadai tentu bebatang bekebun ke lada semina bisi betanam ka anak getah. Nyau pengalama udah pindah ke Luau kebun mulong pen nyau besai serta tinggi lalu tau ditebang serta dijual ngagai Cina di pasar Ng Mukah.

Selalu pengawa nebang mulong tu dikerja maya ai besai tauka bah ianya bulan 11 ngagai bulan 2 tiap tiap taun. Kelia mulong ditebang ngena kapak laban nadai chainsaw enda baka kemaya ari tu. Kebun mulong selalu ditanam ba tanah nebing ai ba tanah emperan. Urang nebang mulong maya ai besai kira tuntung punggong ngambika batang mulong ulih ditebang ba baruh agi, enggaika tebasau. Enti ai agi mabu, batang mulong enda ulih dikalih laban batang mulong ke ditebang diberesi ngambika nyamai dipumpong ujung, dititi enggau dirakit. Batang mulong ke udah diberesi diasulka ngagai Sg Dijih, ma udah chukup pemayuh, lalu dirakit ngena randau tauka rutan. Siti akit mulong begembar 5 kayu sampai tiga sambung retinya, 15 kayu mulong nyadi siti akit. Akit mulong enggai nyadi kelalu besai enggau panjai enggai laban Sg Dijih mit sereta bingkok. Enti akit mulong kelalu besai tauka panjai ia deka tekait ba madang rasau kayu nebing Sg Dijih.

Pengawa nebang mulong tu dikereja berumban laban ngerumban ai ti bah. Enti ai nyu surut, tusah mai batang mulong ngagai sungai sereta ngundurka ngagai pasar. Mulong ke udah tau ditebang deka meragai enti enda ditebang lalu nadai rega laban nadai tentu bisi isi. Maya nebang mulong kami gaga amat laban bulih duit lalu pia mega bulih ikan laban ai besai. Maya ngayutka akit mulong ke pasar, gaga amat bala, asaika bepesta laban semua ke nebang bebala mayuh enggau diri sebilik ngundurka mulong. Sekayu mulong dilumpong 3 kaki pemanjai, lalu sebatang mulong ulih ngasilka 10-15 iti lumpong. Kelia rega selumpong antara RM2.00 ngagai RM2.50, lalu sepintu bilik ulih nebang sampai 100 kayu, bisi ke bagas agi lebih ari nya. Taja pia pengawa tu siti pengawa ti pedis. Kitai berendam besari-sari dalam ai, kadang-kadang ngelaban ujan. Semut naka ia pemayuh, nya meh ngetup kitai belama. Pia mega jemayar seruran bisi, tambahka ular. Nya alai enda tau enda bejaga-jaga maya ke gawa. Enti udah kelalu mayuh semut, kitai nyelam dalam ai, ju ka semut nyau. Taja jemayar mayuh, ia enda ngachau, enda nyenggat, muti ngerayap ba baju kitai. Sida ke indu berapi ba atas perau ngena semawar tauka enti nadai semawar, api diidupka atas tudung deram. Maya chelap amat, dia meh endur bekindu dulu sebedau gawa baru.

Diatu sida menyadi aku benung di menua lama kami di Ng Luau, benung nebang mulong. Bulih amat sida, nyu betapat sapa bagi bilik ke ulih nebang mayuh agi. Dalam kandang 4 ari, siku menyadi aku ulih nebang 128 kayu, siku 89 kayu. Diatu rega mulong RM6.50 selumpong nya alai rega 100 kayu lebih kurang RM6500.00. Rega mulong tu tadi deka dibagi diri sebilik ngambika sama puas ati bisi ungkup.

Aku empu kala enggau orang nebang mulong ngelaban ai, ngelaban chelap, ujan, belaya enggau kesa, jemayar, lintah, ular, nyamuk tang ati gaga laban tu meh maya peluang bulih duit ringgit, belauk ka ikan enggau upak rotan & upa mulong.....rindu bermuto kulu kili mintas tanjung asaika bemain ba ai!

Kami menyanak pen bisi kebun mulong, utai ke ditinggalka sida aki ini. Enti kelia rega nyual mulong tu meh kena sida niang apai indai nyengulaka aku. Tang pengudah aku kerja mulong ditebang menyadi aku aja. Menyadi aku meri bala anak aku ang pow kena ngelaie share aku ba kebun mulong. Aku selalu amat ka mulaika diri ke Ng Luau maya orang nebang mulong tang enggai kediri. Bini anak dibai aku ke Luau ngabas kebun mulong enggai, mayuh utai diketakutka. Indai Maie takutka ular, jemayar, bala anak takut diketup semut, enggai berujan. Mayuh kebuah sida. Aku mutap, udah bakatu jual mulong kitai ngagai menyadi aku ku aku. Ila bala anak enda nemu dini endur tanah, enda nemu entara enggau urang. Enda setuju sida menyanak nyual, manah agi besilih enggau tanah bukai ku sida.

Ukai madahka pemisi diri kebun getah, tanah paya, temuda rimba pen bisi mega kami menyanak di Luau din tang nadai kala diabas laban menua nya diatu bedau datai jalai. Jalai kin ngena perau, enti ngena moto 25 kuda sejam setengah baru datai di Ng Luau tang enti ai langkang 2-3 jam baru datai din. Rindu aku ninga cerita sida ke pulai ari nyin madahka ikan agi mayuh, tak makai ikan pagi, tengah ari enggau lemai. Pia mega mayuh jelu, sida bulih pelanduk, kera enggau nyumboh. Sekeda bala tepedaka rusa 3 iku tang laban ke enda mai senapang enda ulih nimbak rusa. Apai indai rusa ulih ngeraika diri, semina anak rusa ke ulih tangkap sida.

Pengudah musim nebang mulong tu ila matar tauka tindoh pun mayuh din. Babi mayuh, laban makai pun mulong. Matar tu nyamai amat enti di bbq. Matar mega tau di empa matak sebaka ke dipeda ba Astro Channel "Man vs Wild" Aku kala kin 5 taun tu ti udah ngemuas ka diri makai matar. Sinu aku ngenati ka menua ke ditinggalka sida niang apai indai jarang di undang kami, laban kami udah pindah berumah baru ba tisi jalai Dijih.